被人遺忘的孖生兄弟 - BT 15 藍色普通車版

BT 15 的出現，大家的目光都放係大佬(白色警車版)，一來好忠實咁將日本警車做出來，二來 Prowl 的真身就正正是警車，所以細孖(藍色普通車版)一出世，就注定要活係大佬既陰影下。 XDDD

正因為係咁，細佬既價錢就大跳樓，而家差吾多係大佬既一半呢 ... 呢個亦係我買佢既原因 .. 哈哈

論做工論精細度，其實都係水準之上的，不論係車頭既 logo，同車身既貼紙，都一一忠實咁表現出來; 車背設計確實不錯，背門開的幅度之大，應該是眾BT 車之最了，除了天生因為要遷就變形，而將車尾一分為二呢個缺點，影響了外觀外，車的型態可謂好完美的。

武器方面，有警棒同槍，槍仍是用引擎變成，而警棒就放你車尾。較細心的設計是，當變成機械人後，原本死氣喉的位竟可掛上警棒，這設計除了增加了幾分機動警察feel 外，亦令人感覺到設計師的細心。

機械人方面，坦白說，筆者是較喜愛 RX-8 那種車頭正面向出的設計。像 Prowl 這種車頭向下的設計，會令人有一種"胸前偉大"的感覺 ... 而且呢個設計也會令機械人變成無腰似的 ... 令到整體觀感失去了不少分數。

整個機械人，可動幅度確實不多，除了雙手可作 180 的動作外，腰雖然可以轉 180 度，但因無腰的設計，令要做一些扭腰的動作時，感覺不太好看；至於雙腳方面，因為車尾向後的關係，令到可動性下降，雖然左右伸出可做出"大"字型動作，但由於只有一個關節的關係，所以不可以做出彎腳的動作；腳跟的設計，較以住的來得穩陣，筆者在影相時，嘗試做不同的動作時都沒有跌下來，證明這個新設計是成功的。

最後是賣相方面，坦白說，如果他不是背負 Prowl 的身份，相信會更成功，但由於T 記一模兩款的作法，令到這藍車版的外觀只有合格的分數吧了。

BT，這個系列都係走成年人的路線，價錢同品質都是值回票價的，喜愛真車的人一定會愛上車的型態，但對於我地呢類老變 fans 來說，可玩性才是重點，由於關節少，可做的 pose 不多。

坦白說，好多人玩了一次後，因為他複雜的變形，都是變回車收回盒算的，但呢隻BT，感覺上比起以前容易變多了，少了那種為變而變的設定，比起以往來得簡單了一些，所以呢隻應該會變多幾次來玩的呢 ... 雖然佢唔係警車版，但小弟都有興趣拿 collection 系列的 Prowl 返出來，同佢一齊影下相呢。